भोटेकोसी बाढीमा हराइरहेका सुदूरपश्चिमका नागरिकको खोजीका लागि मुख्यमन्त्री भट्टको निर्देशन

सुदुरपश्चिम प्रदेश

गृहपृष्ठ
सुदुरपश्चिम प्रदेश
भोटेकोसी बाढीमा हराइरहेका सुदूरपश्चिमका नागरिकको खोजीका लागि मुख्यमन्त्री भट्टको निर्देशन

भोटेकोसी बाढीमा हराइरहेका सुदूरपश्चिमका नागरिकको खोजीका लागि मुख्यमन्त्री भट्टको निर्देशन

मंगलबार, भदौ १६, २०८३ गोदावरी न्युज

सुदूरपश्चिम प्रदेशका मुख्यमन्त्री खगराज भट्टले भोटेकोसीमा आएको बाढीमा हराइरहेका सुदूरपश्चिमका नागरिकको खोज, उद्धार तथा पुनःस्थापनाका लागि आवश्यक पहल गर्न सुरक्षा निकायका प्रमुखहरूलाई निर्देशन दिनुभएको छ।

मुख्यमन्त्री तथा मन्त्रिपरिषद्को कार्यालयमा आज बिहान बसेको सुरक्षा समितिको बैठकमा मुख्यमन्त्री भट्टले उपलब्ध सबै स्रोत–साधन र संयन्त्रको अधिकतम प्रयोग गर्दै हराइरहेका नागरिकको खोज तथा उद्धार कार्यलाई प्रभावकारी बनाउन निर्देशन दिनुभएको हो।

उहाँले सम्भव भएसम्मका सबै उपाय अवलम्बन गरी खोज तथा उद्धार कार्यलाई तीव्र बनाउन तथा सुदूरपश्चिममा हुन सक्ने बाढी तथा अन्य विपद्को सम्भावनालाई मध्यनजर गर्दै सुरक्षा निकायलाई उच्च सतर्कता र तयारी अवस्थामा रहन निर्देशन दिनुभयो।

बैठकमा नेपाल–भारत सीमामा देखिने समस्या समाधान तथा लागूऔषध नियन्त्रणका लागि प्रभावकारी अभियान सञ्चालन गर्न पनि सुरक्षा निकायका प्रमुखहरूलाई निर्देशन दिइएको छ।

यसैबीच, सुरक्षा समितिको बैठकले भोटेकोसी बाढीमा परेका नागरिकको खोज, उद्धार तथा पुनःस्थापनाका लागि आवश्यक पहल गर्ने निर्णय गरेको छ। साथै, सुदूरपश्चिममा बाढी तथा अन्य विपद्को सम्भावनालाई मध्यनजर गर्दै प्रदेशका सबै सुरक्षा संयन्त्रलाई उच्च सतर्कता र तयारी अवस्थामा राख्ने निर्णय गरिएको छ।

प्रकाशित मिति: मंगलबार, भदौ १६, २०८३ १४:५८