सुदूरपश्चिमको मौलिक पर्व गौरा आजदेखि सुरु, घर–घरमा बिरुडा राखिँदै

सुदुरपश्चिम प्रदेश

गृहपृष्ठ
सुदुरपश्चिम प्रदेश
सुदूरपश्चिमको मौलिक पर्व गौरा आजदेखि सुरु, घर–घरमा बिरुडा राखिँदै

सुदूरपश्चिमको मौलिक पर्व गौरा आजदेखि सुरु, घर–घरमा बिरुडा राखिँदै

मंगलबार, भदौ १६, २०८३ गोदावरी न्युज

सुदूरपश्चिमको प्रमुख मौलिक एवं सांस्कृतिक पर्व गौरा आजदेखि विधिवत् रूपमा सुरु भएको छ। भाद्र शुक्लपक्ष पञ्चमीका दिन मनाइने बिरुडा पञ्चमीसँगै गौरा पर्वको सुरुआत भएको हो।

आज व्रतालु महिलाले घरमा मकै वा मास, कलौँ, गहत, गहुँ र गुरुस गरी पाँच प्रकारका अन्न तथा गेडागुडी भिजाएर बिरुडा राख्ने चलन छ। तामाको भाँडालाई गोबरले लिपेर दुबो र अक्षताले सजाई त्यसमा बिरुडा भिजाउने गरिन्छ।

बिरुडालाई गौरादेवीको प्रसादका रूपमा लिइन्छ भने गौरा पूजाआजामा समेत यसको विशेष प्रयोग हुन्छ। बिरुडा भिजाउने क्रममा महिलाहरूले डोटेली भाषाका सगुन तथा फाग गाउने परम्परा पनि छ।

गौरा पर्वका सप्तमी र अष्टमी विशेष दिन मानिन्छन्। सप्तमीका दिन धान खेतमा उम्रिएको साउँबाट गौराको प्रतिमा बनाई ‘गौराघर’मा भित्र्याउने र विशेष पूजाआजा गर्ने चलन छ।

गौरा पर्वमा महिलाले दुबधागो धारण गर्ने परम्परा रहेको छ। धार्मिक तथा सांस्कृतिक मान्यताअनुसार गौरा पूजाले श्रीमान् तथा परिवारका सदस्यको सुख, शान्ति, स्वास्थ्य, दीर्घायु र समृद्धिको कामना गरिन्छ।

प्रकाशित मिति: मंगलबार, भदौ १६, २०८३ ०९:५९