प्रधानमन्त्री वालेन्द्र शाह (बालेन) ले अपी हिमाल बेस क्याम्पकाे भिडियाे साझा गरेका छन् । उनले शनिबार सामाजिक सञ्जाल फेसबुकमा अपी हिमाल बेस क्याम्पमा क्रिकेट खेल्दै गरेकाे भिडियाे साझा गरेका हुन् ।
भिडियोमा अपी हिमाल बेस क्याम्पको उच्च हिमाली वातावरणमा क्रिकेट खेलिएको दृश्य देखिन्छ । हिमालय भट्टले खिचेकाे साे भिडियाे प्रधानमन्त्री शाहले आफ्नाे फेसबुक पेजमा पाेस्ट गरेका हुन् ।
प्रधानमन्त्री शाहले नेपालका पर्यटकीय गन्तव्यहरूको प्रचार–प्रसारमा डिजिटल माध्यमको प्रयोगलाई प्राथमिकता दिँदै आएको सन्दर्भमा यो भिडियो सार्वजनिक गरिएको बुझिएकाे छ । अपी हिमाल सुदूरपश्चिम क्षेत्रमा पर्ने प्रमुख हिमाली शृंखला हो, जहाँको बेस क्याम्प साहसिक पर्यटनका लागि आकर्षणको केन्द्र मानिन्छ ।
अपी हिमाल बेस क्याम्प दार्चुला जिल्लामा अवस्थित एक प्रख्यात पर्यटकीय गन्तव्य हो । सुदूरपश्चिमकै सबैभन्दा अग्लो हिमालका रूपमा रहेको अपी हिमाल विदेशी पर्यटकको आकर्षण र गन्तव्यका रूपमा परिचित छ । यो हिमालको उचाइ ७ हजार १३२ मिटर छ । अपी हिमाल दार्चुलाको अपी हिमाल गाउँपालिकामा पर्दछ ।
अपी नाम्पा संरक्षण क्षेत्रभित्र सात हजार १३२ मिटर उचाइको अपी हिमाल, छ हजार ७५७ मिटर उचाइमा रहेका नाम्पा हिमाल, छ हजार ८५० मिटर रहेको कापाचुली हिमाल, जेठबुहारी, व्यास हिमाललगायतका उच्च हिमशृङ्खला रहेका छन् ।
अपी नाम्पा संरक्षण क्षेत्रमा हिउँचितुवा, रेड पान्डा, मृग, रतुवा, घोरल, नाउर, झारल, कालो भालु, दुम्सी, थारलगायत वन्यजन्तु तथा डाँफे मुनाल, चिर, चिल, भ्याकुर, च्याखुरालगायत दुई सयभन्दा बढी प्रजातिका चरा पाइने गर्छन् ।
