कैलाली - सुदूरपश्चिम प्रदेशको समग्र विकास, समृद्धि र नीतिगत सुधारका विषयमा केन्द्रित ‘सुदूरपश्चिम कचहरी २०८३’ धनगढीमा आयोजना हुने भएको छ। आगामी जेठ २ र ३ गते सञ्चालन हुने कार्यक्रमको तयारी तीव्र पारिएको आयोजक सुदूरपश्चिम विकास फाउण्डेसनले जनाएको छ।
बुधबार धनगढीमा आयोजित पत्रकार सम्मेलनमा फाउण्डेसनका अध्यक्ष शेरबहादुर शाहीले सुदूरपश्चिम प्रदेश नीति तथा योजना आयोगसँगको समन्वयमा आयोजना हुन लागेको उक्त बृहत् संवाद कार्यक्रमले प्रदेशको सम्भावना र समृद्धिको चित्र राष्ट्रिय तथा अन्तर्राष्ट्रिय स्तरमा प्रस्तुत गर्ने विश्वास व्यक्त गरे।
उनका अनुसार कार्यक्रममा शिक्षा, स्वास्थ्य, पर्यटन, रोजगारी, कृषि, पूर्वाधार, सुरक्षित आप्रवासन तथा सुशासनका विषयमा नीतिगत बहस गरिनेछ। कार्यक्रममा उठेका निष्कर्ष तथा सुझावलाई नेपाल सरकारको आगामी बजेट तथा नीतिनिर्माण प्रक्रियामा समावेश गराउन केन्द्र सरकारसमक्ष पठाइने पनि जानकारी दिइयो।
“सुदूरपश्चिम प्रदेशमा पर्याप्त सम्भावनाहरू छन्। हामी बृहत् संवादमार्फत ती सम्भावनाहरूलाई राष्ट्रिय तथा अन्तर्राष्ट्रिय स्तरमा पु¥याउन चाहन्छौं,” अध्यक्ष शाहीले भने, “कार्यक्रमबाट आएका सुझावहरूलाई लिखित रूपमा प्रदेश तथा संघीय सरकारलाई उपलब्ध गराइनेछ।”
पत्रकार सम्मेलनमा सार्वजनिक अवधारणापत्रमा सुदूरपश्चिम प्रदेश ऐतिहासिक, सांस्कृतिक, प्राकृतिक तथा पर्यटन सम्भावनाले समृद्ध भए पनि अपेक्षित विकास हासिल गर्न नसकेको उल्लेख गरिएको छ। प्रदेशमा गरिबी, बेरोजगारी, कमजोर पूर्वाधार, शिक्षा तथा स्वास्थ्य सेवामा असमान पहुँच, युवा पलायन तथा नीति कार्यान्वयनका चुनौती अझै कायम रहेको जनाइएको छ।
अध्यक्ष शाहीका अनुसार कार्यक्रममार्फत सरकार, निजी क्षेत्र र समुदायबीच समन्वय तथा सहकार्य बढाउँदै विकासका बहसलाई एउटै मञ्चमा ल्याउने लक्ष्य राखिएको छ।
कार्यक्रममा बोल्दै सुदूरपश्चिम प्रदेश नीति तथा योजना आयोगका सदस्य नृप सुनारले प्रदेशको विकास प्राथमिकता, लगानीमैत्री वातावरण, पर्यटन प्रवर्द्धन, युवा रोजगारी तथा नीति सुधारका विषयमा ठोस निष्कर्ष निकाल्ने अपेक्षा गरिएको बताए।
उनले यस्ता संवादले नीति तथा योजनामा एकरूपता ल्याउन तथा विकासका मुद्दामा साझा समझदारी निर्माण गर्न सहयोग पुग्ने बताए। उनका अनुसार कार्यक्रमबाट सुदूरपश्चिमको दीर्घकालीन विकासका लागि व्यवहारिक सुझाव तथा कार्ययोजनासमेत तयार गरिनेछ, जसलाई ‘सुदूरपश्चिम घोषणापत्र’का रूपमा सार्वजनिक गरिनेछ।
दुई दिने कार्यक्रममा संघ, प्रदेश तथा स्थानीय तहका सरकार, निजी क्षेत्र, बैंक तथा वित्तीय संस्था, नागरिक समाज, सञ्चारकर्मी तथा विज्ञहरूको सहभागिता रहने आयोजकले जनाएको छ। पत्रकार सम्मेलनको सहजीकरण फाउण्डेसनका सचिव पविन्द्र शाहीले गरेका थिए।
