निजी क्षेत्रसँग सहकार्य गरेर सुदूरपश्चिम समृद्ध बनाउने मुख्यमन्त्री भट्टको प्रतिबद्धता

अर्थ

गृहपृष्ठ
अर्थ
निजी क्षेत्रसँग सहकार्य गरेर सुदूरपश्चिम समृद्ध बनाउने मुख्यमन्त्री भट्टको प्रतिबद्धता

निजी क्षेत्रसँग सहकार्य गरेर सुदूरपश्चिम समृद्ध बनाउने मुख्यमन्त्री भट्टको प्रतिबद्धता

आइतबार, भदौ २१, २०८३ गोदावरी न्युज

सुदूरपश्चिम प्रदेशका मुख्यमन्त्री खगराज भट्टले स्पष्ट सरकारी नीति र निजी क्षेत्रको लगानीमार्फत सुदूरपश्चिमलाई समृद्ध प्रदेशका रूपमा विकास गर्नुपर्ने बताएका छन्।

निजी क्षेत्र र प्रदेश सरकारबीच आयोजित बजेटसम्बन्धी अन्तरक्रिया कार्यक्रममा बोल्दै मुख्यमन्त्री भट्टले औद्योगिक क्षेत्रको विकास र रोजगारी सिर्जनालाई आगामी बजेटमा प्राथमिकताका साथ समेटिने बताए।

उनले प्रदेशको ‘रातो किताब’ रकम वितरण गर्ने पुलिन्दा नभई प्रदेशको समृद्धिको मार्गचित्र बन्नुपर्ने धारणा व्यक्त गरे।

“बजेटले प्रदेशको आवश्यकता, सम्भावना र जनताको अपेक्षालाई सम्बोधन गर्न सक्नुपर्छ। त्यसका लागि यस पटकको बजेटमा हाम्रो प्रयास रहन्छ,” मुख्यमन्त्री भट्टले भने।

मुख्यमन्त्री भट्टले सुशासनमा शून्य सहनशीलताको नीति अवलम्बन गर्दै प्रदेशमा रहेका बेथिति र अनियमितता नियन्त्रण गर्न सरकार निर्मम भएर अघि बढ्ने बताए। बेथितिका विषयमा कुनै पनि सम्झौता नगर्ने स्पष्ट पार्दै उनले सुदूरपश्चिमको विकास र रूपान्तरणका लागि सबै पक्ष एकताबद्ध भएर अघि बढ्नुपर्नेमा जोड दिए।

निजी क्षेत्रले भोग्दै आएका समस्या समाधानका लागि प्रदेश सरकारले आवश्यक पहल गर्ने प्रतिबद्धता व्यक्त गर्दै उनले प्रदेशको आर्थिक विकास र समृद्धिमा निजी क्षेत्रको भूमिका महत्वपूर्ण रहेको बताए।

अन्तरक्रियामा निजी क्षेत्रका व्यवसायीहरूले सुदूरपश्चिममा रहेका सम्भावना, समस्या तथा चुनौतीबारे धारणा राखेका थिए। उनीहरूले कृषि, उद्योग र पर्यटन क्षेत्रको विकासका लागि प्रदेश सरकारले नीतिगत सहजीकरण गर्दै लगानीमैत्री वातावरण निर्माण गर्नुपर्नेमा जोड दिए।

कार्यक्रममा उद्योग, पर्यटन, वन तथा वातावरणमन्त्री प्रकाश रावल, आर्थिक मामिलामन्त्री चक्रबहादुर मल्ल, प्रदेश नीति तथा योजना आयोगका उपाध्यक्ष गोकर्णप्रकाश भट्टलगायतको सहभागिता थियो।

प्रकाशित मिति: आइतबार, भदौ २१, २०८३ १३:५४