आज विजयादशमी : बिहान १०:२६ बजे टीका लगाउने उत्तम साइत

देश

गृहपृष्ठ
देश
आज विजयादशमी : बिहान १०:२६ बजे टीका लगाउने उत्तम साइत

आज विजयादशमी : बिहान १०:२६ बजे टीका लगाउने उत्तम साइत

बुधबार, कात्तिक ४, २०८३ गोदावरी न्युज

नेपालीहरूको महान् पर्व बडादसैँ अर्थात् विजयादशमी आज हर्षोल्लासका साथ मनाइँदै छ।

आज मान्यजनको हातबाट नवदुर्गाको प्रसादस्वरूप रातो टीका र समृद्धिको प्रतीक जमरा लगाएर आशीर्वाद ग्रहण गरिँदै छ।

नेपाल पञ्चाङ्ग निर्णायक विकास समितिका अनुसार आज बिहान १०:२६ बजे टीका लगाउने उत्तम साइत रहेको छ।

समितिका अध्यक्ष प्रा. पुरुषोत्तम भट्टराईका अनुसार विजयादशमी आफैँमा शुभ दिन भएकाले सर्वसाधारणले टीका लगाउन साइत खोज्न आवश्यक छैन। तर राज्य सञ्चालकका लागि भने शुभ साइतमा टीका लगाउने परम्परा रहेको उनले बताएका छन्।

घटस्थापनादेखि नौ दिनसम्म दसैँघर वा पूजा कोठामा विधिपूर्वक पूजा–आराधना गरिएका देवीको प्रसाद आज मान्यजनबाट टीका, जमरा र आशीर्वादका रूपमा ग्रहण गरिन्छ।

समितिका अनुसार आज बिहान ८:४९ बजे घटस्थापनाका दिन स्थापना गरिएको कलशमा आह्वान गरिएका देवीहरूको विसर्जन गर्ने साइत रहेको छ।

आज टीका लगाउन नभ्याउनेहरूले कोजाग्रत पूर्णिमासम्म मान्यजनबाट टीका तथा आशीर्वाद ग्रहण गर्न सक्नेछन्।
विजयादशमीले परिवार तथा आफन्तबीचको आत्मीयता, सद्भाव र एकतालाई थप मजबुत बनाउने विश्वास गरिन्छ।

प्रकाशित मिति: बुधबार, कात्तिक ४, २०८३ ०८:५०