नेपाल मौसम विज्ञान विभागको मौसम पूर्वानुमान महाशाखाले आगामी साताको अन्त्यतिर देशका विभिन्न स्थानमा वर्षा तथा हिमाली क्षेत्रमा हिमपातको सम्भावना रहेको जनाएको छ। महाशाखाले जारी गरेको साप्ताहिक मौसम पूर्वानुमान बुलेटिनअनुसार बुधबार र बिहीबार मौसम प्रतिकूल हुन सक्ने देखिएको हो।
महाशाखाका अनुसार साताको सुरुवात र मध्यतिर केही स्थानमा हल्का वर्षा तथा हिमपातको सम्भावना रहे पनि साताको अन्त्यतिर वर्षा र हिमपातको गतिविधि बढ्न सक्नेछ।
कोसी, बागमती र गण्डकीमा भारी हिमपातको सम्भावना
कोसी, बागमती र गण्डकी प्रदेशका हिमाली क्षेत्रमा साताको अन्त्यमा धेरै स्थानमा मध्यम हिमपात, केही स्थानमा भारी तथा एक–दुई स्थानमा धेरै भारी हिमपात हुन सक्ने पूर्वानुमान गरिएको छ। यी प्रदेशका पहाडी क्षेत्रमा पनि वर्षाको सम्भावना रहेको छ।
त्यस्तै, कोसी प्रदेशको तराई क्षेत्रमा केही स्थानमा मध्यम वर्षा तथा एक–दुई स्थानमा भारी वर्षा हुन सक्ने महाशाखाले जनाएको छ। बागमती र गण्डकी प्रदेशका पहाडी तथा तराई क्षेत्रमा पनि साताको अन्त्यमा वर्षाको सम्भावना रहेको छ।
लुम्बिनी, कर्णाली र सुदूरपश्चिममा पनि वर्षा र हिमपात
लुम्बिनी प्रदेशका पहाडी तथा तराई क्षेत्रमा साताको अन्त्यमा केही स्थानमा मध्यम वर्षा तथा एक–दुई स्थानमा भारी वर्षा हुन सक्ने सम्भावना छ। हिमाली क्षेत्रमा पनि मध्यमदेखि भारी हिमपात हुन सक्ने पूर्वानुमान गरिएको छ।
कर्णाली प्रदेशका हिमाली क्षेत्रमा केही स्थानमा मध्यम तथा एक–दुई स्थानमा भारी हिमपातको सम्भावना रहेको छ। पहाडी क्षेत्रमा भने साताको अन्त्यमा केही स्थानमा मध्यम वर्षा हुन सक्ने महाशाखाले जनाएको छ।
सुदूरपश्चिम प्रदेशका हिमाली क्षेत्रमा साताको अन्त्यमा केही स्थानमा मध्यम तथा एक–दुई स्थानमा भारी हिमपात हुन सक्ने सम्भावना छ। पहाडी क्षेत्रमा केही स्थानमा मध्यम वर्षा हुन सक्नेछ भने तराई क्षेत्रमा थोरै स्थानमा मध्यम वर्षाको सम्भावना रहेको छ।
मौसमको अवस्था हेरेर यात्रा गर्न सुझाव
मौसम प्रतिकूल हुन सक्ने पूर्वानुमानलाई ध्यानमा राख्दै वर्षा तथा हिमपातको सम्भावना भएका क्षेत्रमा यात्रा गर्नेहरूले मौसमको पछिल्लो सूचना लिएर मात्र यात्रा गर्नु उपयुक्त हुन्छ। विशेषगरी हिमाली तथा पहाडी क्षेत्रमा यात्रा गर्दा सम्भावित मौसम परिवर्तनबारे सतर्क रहन आवश्यक छ।
