"अब कुनै बहानामा गेटा मेडिकल विश्वविद्यालयको गति रोकिनु हुँदैन" – नगर प्रमुख गोपाल हमाल

राजनीति

गृहपृष्ठ
राजनीति
"अब कुनै बहानामा गेटा मेडिकल विश्वविद्यालयको गति रोकिनु हुँदैन" – नगर प्रमुख गोपाल हमाल

"अब कुनै बहानामा गेटा मेडिकल विश्वविद्यालयको गति रोकिनु हुँदैन" – नगर प्रमुख गोपाल हमाल

आइतबार, साउन १०, २०८३ गोदावरी न्युज

धनगढी उपमहानगरपालिकाका नगर प्रमुख गोपाल हमालले गेटा मेडिकल विश्वविद्यालयमा अब थप ढिलाइ नगरी यही शैक्षिक सत्रबाटै पठनपाठन सुरु गर्नुपर्ने बताएका छन्।

नगर प्रमुख हमालले नगर प्रमुख तथा यस क्षेत्रका जनताका हैसियतले गेटा मेडिकल कलेज अहिले विश्वविद्यालयको रूपमा स्थापित भइसकेको उल्लेख गर्दै अब यसको शैक्षिक गतिविधि तत्काल सुरु हुनुपर्नेमा उपमहानगरपालिका दृढ रहेको बताए।

उनले विश्वविद्यालयका पदाधिकारी नियुक्तिलाई भन्दा पनि शैक्षिक गतिविधि सञ्चालन र सर्वसाधारणलाई गुणस्तरीय स्वास्थ्य सेवा उपलब्ध गराउने विषयलाई प्राथमिकतामा राख्नुपर्ने धारणा व्यक्त गरे।

“को पदाधिकारी बन्यो वा बनेन भन्ने विषय तपसिलको कुरा हो। धेरै लामो प्रतीक्षापछि गेटा मेडिकल कलेज सही दिशामा अघि बढेको छ। अब कुनै पनि बहानामा यसको गति रोकिनु हुँदैन,” उनले भने।

हमालले गेटा मेडिकल कलेजको पूर्वाधार विकास समितिको नेतृत्वसँग आफू प्रत्यक्ष रूपमा जोडिएको अनुभवसमेत स्मरण गरे। उनका अनुसार यसअघि डा. चेतराज पन्तको अध्यक्षतामा रहेको पूर्वाधार विकास समितिको कार्यकाल सकिएपछि शिक्षा मन्त्रालयको अधिकारअनुसार धनगढी उपमहानगरपालिकाले समितिको कार्यवाहक अध्यक्षको जिम्मेवारी सम्हालेको थियो, जसको नेतृत्व आफूले गरेको बताए।

उनले सुदूरपश्चिमका नागरिक गेटा मेडिकल विश्वविद्यालयसँग भावनात्मक रूपमा जोडिएको उल्लेख गर्दै अब कुनै अन्योल वा शंका नगरी यही शैक्षिक वर्षमै कम्तीमा एमबीबीएस तहको पठनपाठन सञ्चालन हुने वातावरण बनाउन सबै सरोकारवाला पक्षले सहकार्य गर्नुपर्नेमा जोड दिए।

प्रकाशित मिति: आइतबार, साउन १०, २०८३ १७:०६