सरकारसँग ६ बुँदे सहमतिपछि डा. गोविन्द केसीको २५औँ सत्याग्रह अन्त्य

देश

गृहपृष्ठ
देश
सरकारसँग ६ बुँदे सहमतिपछि डा. गोविन्द केसीको २५औँ सत्याग्रह अन्त्य

सरकारसँग ६ बुँदे सहमतिपछि डा. गोविन्द केसीको २५औँ सत्याग्रह अन्त्य

शनिबार, कात्तिक २१, २०८३ गोदावरी न्युज

नेपाल सरकार र अनशनरत डा. गोविन्द केसीबीच ६ बुँदे सहमति भएको छ। सहमतिसँगै डा. केसीले शनिबार राति आफ्नो २५औँ सत्याग्रह अन्त्य गरेका छन्।

पटकपटकको छलफलपछि शिक्षा तथा खेलकुदमन्त्री सस्मित पोखरेल शनिबार राति त्रिवि शिक्षण अस्पताल पुगेर डा. केसीसँग सहमति गरेका हुन्।

सहमति भएपछि मन्त्री पोखरेलले अब यो नै डा. केसीको अन्तिम अनशन हुने विश्वास व्यक्त गरेका छन्। उनले डा. केसीसँग भएका सहमतिअनुसार कार्यान्वयन प्रक्रिया अघि बढाइने बताएका छन्।

डा. केसी र सरकारबीच भएको सहमतिपत्रमा डा. केसी, शिक्षा तथा खेलकुदमन्त्री सस्मित पोखरेल, प्रधानमन्त्रीका स्वास्थ्य सल्लाहकार प्रा. डा. जगदीश अग्रवाल, सांसद् पुकार बम र नेपाल मेडिकल एसोसिएसनका अध्यक्ष डा. बद्री रिजालले हस्ताक्षर गरेका छन्।

सहमतिका महत्वपूर्ण विषयमध्ये दशरथ चन्द स्वास्थ्य विज्ञान विश्वविद्यालय ऐन, २०८२ मा आवश्यक संशोधन गर्ने विषय पनि रहेको छ। विश्वविद्यालयका पदाधिकारीको योग्यता तथा नियुक्तिसम्बन्धी व्यवस्थामा संशोधन गरी दुई साताभित्र मन्त्रिपरिषद्बाट अध्यादेश जारी गर्ने सहमति भएको छ।

अध्यादेश जारी भएपछि नयाँ पदाधिकारी नियुक्तिको प्रक्रिया तत्काल अघि बढाइने सहमतिमा उल्लेख छ।
लामो समयदेखि चिकित्सा शिक्षा तथा स्वास्थ्य क्षेत्रको सुधारको माग राख्दै सत्याग्रह गर्दै आएका डा. केसीको अनशन अन्त्य भएसँगै सहमतिका बुँदाहरू कार्यान्वयन हुने विषयलाई चासोका साथ हेरिएको छ।