डडेल्धुरा- आगामी निर्वाचनमा स्पष्ट बहुमत ल्याउन मिसन ग्रासरुट अभियान सुरु भएको नेपाल कम्युनिष्ट पार्टी (एमाले) का उपाध्यक्ष तथा पूर्वअर्थमन्त्री विष्णुप्रसाद पौडेलले बताएका छन । प्रेस चौतारी नेपाल जिल्ला शाखा डडेल्धुराले बुधवार आयोजना गरेको पत्रकार सम्मेलनमा बोल्दै पौडेलले यस्तो बताएका हुन ।
उनले भर्खरै सम्पन्न भएको निर्वाचनबाट जनताले कुनै पनि राजनीतिक दललाई स्पष्ट बहुमत नदिएको र ढिलो चाँडो देशमा फेरी चुनाव हुने अवस्था आएको बताउँदै आगामी निर्वाचनमा स्पष्ट बहुमत सुनिश्चित गर्नको लागी नेकपा एमालेले देशका सबै पालिका तथा वडामा मिसन ग्रासरुट अभियान सुरु गरिरहेको जानकारी दिए ।
यस्तै उनले वर्तमान सरकार ढलाउने खेलमा एमाले नरहेको पनि स्पष्ट पारे । उपाध्यक्ष पौडेलले मुलुकमा राजनीतिक स्थायित्वको अभावमा अर्थतन्त्र धराशायी बन्न थालेकोले एमालेले जिम्मेवार प्रतिपक्ष बनेर सरकारलाई सही बाटोमा हिँडाउने भूमिका निर्वाह गर्ने बताए ।
उपाध्यक्ष पौडेलले नेपालमा आर्थिक सङ्कटको अवस्था भयावह बनिरहेको समेत जिकीर गरेका छन । अर्थतन्त्र डर लाग्दो अवस्थामा रहेको र २०२८ सालपछि पहिलो पटक अघिल्लो वर्षको तुलनामा कम राजस्व संकलन भएको उनले बताए ।
पौडेलले आरोप भन्दा शक्तिशाली तथ्य हुने बताउँदै आर्थिक संकटतर्फ उन्मुख अर्थतन्त्रलाई ठिक लयमा फर्काउन आफूले निकै कोसिस गरेको जिकिर गरे । सरकारले आर्थिक अराजकता नियन्त्रण गर्नुको साटो फजुल खर्च बढाउँदै लगेकाले मुलुकमा थप गम्भीर आर्थिक सङ्कटको अवस्था उत्पन्न हुने उनले ठोकुवा गरे ।
