धनगढी - सुदूरपश्चिम प्रदेश सरकारले जेठ १३ गतेदेखि बजेट अधिवेशन बोलाउने निर्णय गरेको छ।
आइतबार मुख्यमन्त्री कार्यालयमा बसेको मन्त्रिपरिषद्को पहिलो बैठकले उक्त निर्णय गरेको हो।
जेठ १३ गते दिउँसो २ बजेदेखि बजेट अधिवेशन बोलाउने निर्णय भएको मुख्यमन्त्री कमलबहादुर शाहको सचिवालयले जनाएको हो।
प्रदेश सभाको हिउँदे अधिवेशन शनिबार (जेठ ६ गते) अन्त्य भएको थियो। आइतबार मुख्यमन्त्री कार्यालयमा बसेको मन्त्रिपरिषद् बैठकमा मुख्यमन्त्री शाह, भौतिक पूर्वाधार मन्त्री प्रकाश देउवा, आर्थिक मामिला मन्त्री नरेश बहादुर शाही,आन्तरिक मामिला तथा कानून मन्त्री पृथ्वीबहादुर सिंह, सामाजिक विकास मन्त्री झपट साउँद र वन तथा उद्योग मन्त्री रमेश धामी सहभागी थिए।
प्रदेश सरकारले नीति तथा कार्यक्रम र बजेट ल्याउने समय नजिकिएका कारण हिउँदे अधिवेशन अन्त्य भएको दुई दिनमै बजेट अधिवेशन बोलाइएको हो।
मन्त्रिपरिषद्को सिफारिसपछि प्रदेश प्रमुखले अधिवेशन आह्वान गर्ने व्यवस्था छ।
