डडेल्धुरामा हाइस दुर्घटना हुँदा एकजनाको मृत्यु भएको छ भने अन्य नौ जना घाइते भएका छन् । यात्रु भर्नका लागि रोकिएको अवस्थामा हाइस अचानक पछाडि गएर गन्याधुरा गाउँपालिका–३ गुयलखेतमा झाडिमा जादा डोटीको सायल गाउँपालिकाका २६ वर्षीय गणेश साउदको मृत्यु भएको हो । उनको डडेल्धुरा अस्पतालमा उपचारको क्रममा मृत्यु भएको जिल्ला प्रहरी कार्यलय डडेल्धुराले जनाएको छ ।
डोटी खतिवडाका ५७ बर्षीय कैल्या ढोलीको अवस्था चिन्ताजनक रहेको प्रहरीले बताएको छ । सामान्य घाइते हुनेमा दिपायल सिलगढी नगरपालिकाका ५० वर्षीया कला दमाई, ३७ वर्षीया लक्ष्मी नेपाली दमाई, शिखर नगरपालिका–११ का ६२ वर्षीय जय दमाई उनकी श्रीमती ४५ वर्षीया विस्ना दमाई र उनका छोरा ३ वर्षीय उद्यव दमाई, बारबाटा डोटीका ४० वर्षीय राजु नेपाली यस्तै डडेल्धुराको गन्यापधुरा गाउँपालिका–५का ६२ वर्षीय ईश्वर सिं टमटा र कैलालीको जानकी गाउँपालिका–२ का वीरबहादुर रोक्का मगर रहेको जिल्ला प्रहरी कार्यलय डडेल्धुराका प्रहरी नायव उपरिक्षक डम्बरबहादुर केसीले जानकारी दिनुभयो ।
घाइते सबैको डडेल्धुरास्थित डडेल्धुरा अस्पतालमा उपचार भइरहेको छ । दिपालय सिलगढीबाट धनगढी आउदै गरेको बा २ ख १६६५ नम्बरको सुदूरपश्चिम यातायातको हाइस सोमबार बिहान १०ः३० बजेतिर दुर्घटनामा परेको हो । हाइस चालक विनय बोहरा र गाडीधनी देव सिंहभाट प्रहरीले नियन्त्रणमा लिएको छ ।
