धनगढी -सुदूरपश्चिम प्रदेशसभा सदस्य नरहेको घोषणा गरेका कर्णबहादुर मल्लले प्रदेश सभा सदस्यको हैसियतमा मासिक रुपमा सरकारी सेवा सुविधा बुझिरहेको खुलासा भएको छ ।
२०७४ सालको निर्वाचनमा डडेल्धुराबाट प्रदेशसभा सदस्य विजयी मल्ललाई नेपाली कांग्रेसले साधारण सदस्य समेत नरहनेगरि कारबाही गरेपछि उनले प्रदेशसभा सदस्य त्यागेको घोषणा गरेका थिए ।
प्रदेश सभा त्याग्ने घोषण गरे पनि उनले प्रदेशसभा सचिवालयमा राजिनामा नदिएका कारण सेवा सुविधा पाइरहेका हुन् । प्रदेशसभा सचिवालयका सूचना अधिकारी युवराज जैशीले मल्लले मल्लले राजिनामा दिएको जानकारी प्राप्त नभएका कारण प्रदेश सभा सदस्यको हैसियतमा कानून बमोजिम पाउने सेवासुविधा उपलब्ध गराइरहेको बताए ।
अरु प्रदेशसभा सदस्य सरह मासिक रुपमा पाउने तलब भत्ता, अतिथि सत्कार, आवास सुविधा वापतको रकम सचिवालयले मल्लको खातामा जम्मा गर्दै आएको छ । पार्टीले निष्काशन गरेपछि उनले डडेल्धुरामा पत्रकार सम्मेलनको आयोजना गर्दै सुदूरपश्चिम प्रदेशसभा सदस्य पदमा नरहने घोषणा गरेका थिए, तर सभामुखलाई राजिनामा भने दिएका थिएनन् ।
वैशाख ३० मा सम्पन्न स्थानीय तहको निर्वाचनमा मल्लले कांग्रेस बीपीबाट नेकपा एमालेसँग चुनाव तालमेल गरेका थिए ।
