बैतडी - जिल्लाको सिगास गाउँपालिकाले सुत्केरीलाई उपाध्यक्षको कोसेली वितरण गर्न थालेको छ । हजार दिने आमाको स्वास्थ्य र पोषणमा सुधार ल्याउनका लागि सुत्केरी आमाहरुलाई कोसेली वितरण गर्न थालिएको गाउँपालिकाका उपाध्यक्ष द्रोपती चन्दले जानकारी दिइन । गाउँपालिकाका प्रत्येक स्वास्थ्य संस्था मार्फत कोसेली वितरण कार्य भईरहेको उनले बताइन् ।
हजार दिने आमाको स्वास्थ्य र पोषणका बिषयमा घरपरिवारका सदस्यहरु पनि जानकार होउन भन्ने उद्देश्यले यो कार्यक्रम सञ्चालनमा ल्याइएको उपाध्यक्ष चन्दले जानकारी दिइन् । स्वास्थ्य संस्थामा नियमित रुपमा गर्भजाँच गर्ने र स्वास्थ्य संस्थामै बच्चा पाएका आमाहरुलाई कोसेली वितरण गर्ने गरिएको उनले बताइन् ।
कोसेलीमा २ केजी आयोडिनयुक्त नुन, १ केजी चना, १ केजी मटर, सेनेटाइजर, रुमाल र सरसफाईका सामग्री राखिएको चन्दले जानकारी दिइन्। गाउँपालिकाका ९ ओटै वडामा कोसेली पुर्याउने काम भईरहेको समेत उनले बताइन ।
उपाध्यक्षको कोसेली कार्यक्रमले गर्भावस्था र सुत्केरी अवस्थामा आमाको हेरचाहका लागि परिवार सदस्यहरुको भूमिकालाई अझै मजबुत बनाउने ढुंगाड स्वास्थ्यचौकीका प्रमुख हेमन्तसिंह साउँदले जानकारी दिए । यस कार्यक्रमले घरपरिवारका सदस्यहरु हजार दिने आमा र बच्चाको स्वास्थ्य र पोषणका बिषयमा जानकार हुने उनले बताए ।
जिल्लाका अन्य स्थानीय तहहरुले पनि गर्भवती तथा सुत्केरी आमाहरुका लागि विभिन्न कार्यक्रम सञ्चालन गर्दै आईरहेका छन् ।
