काठमाडौं - नेपालमा अत्यधिक सफलता प्राप्त गरेको नेपाली चलचित्र ए मेरो हजुर ४ प्रथम प्रदर्शन डिसी क्षेत्रको भर्जिनियामा हुने भएको छ । उक्त चलचित्र नेपाली अमेरिकन सामुदायिक केन्द्र (न्याक) ले गर्ने भएको हो । उक्त चलचित्रको समन्वय न्याककी बिना खड्कालामाले गरि रहेकी छिन् । चलचित्र भर्जिनिया राज्यको फेयरफ्याक्स स्थित सिनेमा आर्ट्स थेटर नामक चलचित्र मन्दिरमा हुने भएको छ ।
चलचित्र हेर्न केवल २० डलर राखिएको छ भने नेपाली चलचित्रलाई माया गर्ने र यस क्षेत्रमा बसोबास गर्ने सबै नेपाली समुदायलाई जुन २६ आईतबारका दिन प्रथम प्रदर्शन हुने उक्त चलचित्र हेर्न सबैलाई बिना खड्कालामाले अनुरोध गरेकी छिन । चलचित्रबाट आएको केही आर्थिक लाभ नेपाली अमेरिकन सामुदायिक केन्द्रलाई जाने बताइएको छ । उक्त चलचित्र झरना थापाले निर्देशन गरेकी हुन् भने चलचित्रमा अनमोल केसी र सुहाना थापा रहेका छन् । अनमोल र सुहाना सहित सलोन बस्नेत, सरोज खनाल, रियर राई, रवि गिरी लगायतले यो चलचित्रमा अभिनय गरेका छन् ।
नेपालबाट अमेरिका र अमेरिकाबाट नेपाल आउने जाने क्रम भएता पनि चलचित्र निर्देशक झरना थापा, सुनिल कुमार थापा र नायिका सुहाना थापा अमेरिकाको डिसी महानगर क्षेत्रमै बसोबास गर्छन । निर्देशक झरना थापा तथा नायिका सुहाना थापाले प्रथम प्रदर्शनमा सहभागी हुने छ । उनीहरु दर्शक माझ चलचित्र हेर्ने छन् ।
