अत्तरिया - सुदूरपश्चिम प्रदेश भ्रमणमा रहेका प्रधानमन्त्री शेरबहादुर देउवाले आज कैलालीको बाढी पहिरो प्रभावित क्षेत्रको निरीक्षण गरिरहेका छन् ।
लगातारको बर्षापछि आएको बाढी र पहिरोका कारण प्रभावित भएको क्षेत्रमा बिहान देखी प्रधानमन्त्री देउवा सहित मन्त्री र पूर्वमन्त्रीहरुको टोली पुगेका छन् ।
बिहीबार बिहान काठमाडौंबाट सुर्खेत पुगेको प्रधानमन्त्री देउवा नेतृत्वको टोलीले डोटी, बझाङ, बैतडी, डडेल्धुरा हुँदै साँझ कञ्चनपुर पुगेर बाढी पहिरो र डुबानको स्थलगत निरिक्षण गरेको थियो ।
प्रधानमन्त्रीले साँझ कञ्चनपुरमा ब्रह्मदेव र महाकाली तटीय क्षेत्रको हवाई निरीक्षण समेत गरेका थिए। त्यसक्रममा प्रधानमन्त्री देउवाले प्रभावित नागरिकलाई तत्काल उद्धार तथा सुरक्षित स्थानमा व्यवस्थापन गर्न प्रमुख जिल्ला अधिकारी र सुरक्षा निकायका प्रमुखहरूलाई निर्देशनसमेत दिएका छन् ।
आज थप क्षेत्रको निरीक्षण गरी साझँ काठमाडौं फर्किने कार्यक्रम तय भएको छ । सो टोलीमा प्रधानमन्त्री देउवासँगै अर्थमन्त्री जनार्दन शर्मा, संस्कृति, पर्यटन तथा नागरिक उड्डयनमन्त्री प्रेम आले, कांग्रेसका केन्द्रीय सदस्यहरू तथा पूर्वमन्त्रीहरु एनपी साउद, रमेश लेखक र वीरबहादुर बलायर रहेका छन् ।
