काठमाडौं - निर्वाचन आयोगले दुईवटा नगरपालिकाको बारेमा के गर्ने भन्नेबारे अझै टुंगो लगाउन सकेको छैन्। अधिकांश स्थानीय तहको मतगणना सकिनै लाग्दा पनि आयोग दुई नगरपालिकाको मतदान गर्ने वा मतगणना सुरु गर्ने भन्नेमा अन्योल नै छ।
गएको वैशाख ३० मा बाजुराको बुढीगंगा नगरपालिका र उदयपुरको त्रियुगा नगरपालिकामा मतदान रोकिएको थियो। बाजुराको बुढीगङ्गा नगरपालिका ५ भानोदय मावि मतदान केन्द्रमा एमाले र कांग्रेसका कार्यकर्ताबीच झडप भएको थियो। झडपपछि मतदान कार्यको व्यवस्थापनमा राखिएका सामग्रीहरु पनि तोडफोड भएका थिए। त्यसपछि त्यहाँ मतदान नै रोकियो।
त्यस्तै ,उदयपुरको त्रियुगा नगरपालिकामा चुनाव भइरहँदा ३० गते दिउँसो मुसलधारे पानी परेर रोकियो। पानीबाट ओत लाग्न मतदाताको भागाभाग हुँदा मतदान अधिकृतले रोके। तर यसबारे कुनै निर्णय नै नगरी मुख्य निर्वाचन अधिकृत जिल्ला न्यायाधीश दीपक खनालले राजीनामा दिए। तर पनि अझै के गर्ने भन्नेबारे टुंगो लागेको छैन्।
