अत्तरिया - सुदूरपश्चिम प्रदेशमा थप ५५८ जनामा कोरोना पुष्टि भएको छ भने २ जनाको मृत्यु भएको छ । पछिल्लो २४ घण्टाको अबधिमा प्रदेशभरि एक हजार ९१३ जनाको नमुना परीक्षण गर्दा थप ५५८ जनामा कोरोना संक्रमण पुष्टि भएको हो ।
प्रदेश स्वास्थ्य निर्देशनालय डोटीका अनुसार ३०७ जनाको नमुना पिसिआर बिधिवाट परीक्षण गर्दा १ सय ९४ जना र १ हजार ६ सय ६ जनाको नमुना एन्टिजेन विधिबाट परीक्षण गर्दा ३६४ जनामा संक्रमण देखिएको हो । उनीहरु मध्ये १०० जना आजै भारतवाट फर्किएकाहरु रहेका छन् ।
यस्तै २४ घण्टामा २ जना कोरोना संक्रमितको मृत्यु भएको छ । धनगढीको सेती प्रादेशिक अस्पतालको आईसियूमा उपचाररत कैलालीका २ जना पुरुषको मृत्यु भएको हो ।
मृत्यु हुनेमा कैलालीको गोदावरी नगरपालिका वडा नं ५ घर भएका ६२ बर्षीय र बर्दगोरिया गाउँपालिकाका ७५ बर्षीय पुरुषको मृत्यु भएको जिल्ला प्रशासन कार्यालय कैलालीले जनाएको छ ।
यस्तै गएको २४ घण्टाको अबधिमा १३० जना कोरोना संक्रमित निको भएका छन् ।
